CMO BATTALION AT 202 BRIGADE MAGKATUWANG NA NAG-INFO DRIVE SA DLSP SAN PABLO CITY

Agnes Lopez Reano

        

          Positibong tinanggap ng pamunuan ng DALUBHASAAN NG LUNSOD NG SAN PABLO (DLSP)  ang isinagawang information and awareness drive ng 202 INFANTRY “UNIFIER” BRIGADE  sa pamumuno ni COL VIRGILIO M ESPINELI (GSC) PA at ng CIVIL MILITARY OPERATIONS BATTALION  sa pamumuno naman ni COL BUENAVENTURA C PASCUAL (MNSA).  Ginanap nitong ika-18 ng Hunyo ang info drive sa covered court ng nasabing paaralan na dinaluhan ng mahigit sa dalawang libo at limang daang estudyante (2,500).

           

          Pinangunahan ni 2LT MARIADITA K OMANDAM ang speaker’s bureau team ng 202nd Infantry Brigade na nagpaliwanag sa mga estudyante ng layunin ng nasabing unit sa kanilang bayan at lalawigan.  Binigyang diin ni LT OMANDAM na pangunahing nilalayon ng 202 Brigade ang pagpapanatili ng kaayusan at kapayapaan sa lalawigan ng Laguna upang makamit nang tuluyan ang kaunlaran.  Sinabi pa ni LT OMANDAM na mas tuloy-tuloy ang progreso ng lalawigan kung matutuhan lamang ng bawat isang residente nito ang “COOPERATION MANAGEMENT” kaysa sa “CONFLICT MANAGEMENT”. Katuwang ng 202nd Brigade ang ROTC ng nasabing unibersidad.

 

          Inamin naman ng ilang mga guro ng nasabing paaralan na noong mga nakalipas na taon ay may estudyante silang positibong mga miembro ng prenteng organisasyon.  Taos pusong nagpasalamat naman si MS BENILDA DUMARAOS, presidente ng DLSP sa 202nd Infantry brigade at CMO Battalion.  Ayon kay Mam Dumaraos malaking tulong para sa kanilang mga guro at namumuno ng unibersidad ang ginagawang maigting na information drive ng HUKBONG KATIHAN NG PILIPINAS dahil na rin sa hindi umano maitatatwang mga kabataan ang pangunahing target sa pagrerekrut ng mga prenteng organisasyon.

 

            Nagpasalamat din si MRS OPLE ang NSTP Director ng DLSP sa ginawang pagdalaw at paglalaan ng oras ng 202nd Infantry Brigade sa kanilang paaralan.  Ayon kay Mrs Ople kung may konserna ang mga kasundaluhan sa kanilang mga estudyante dapat na manguna silang mga guro sa pangangalaga sa mga kabataang naka-enroll sa kanilang paaralan.  Ayon pa kay MRS OPLE dapat ding maging bahagi ang mga magulang sa pagsisikap ng buong SANDATAHANG LAKAS NG PILIPINAS na mapangalagaan ang mga kabataan.

           

          Hiniling naman ng pamunuan ng DLSP sa 202nd Infantry Brigade na muling balikan ang kanilang paaralan at isagawa ang info drive sa lahat ng departamento nito upang mabigyan ng tamang impormasyon ang mga kabataan.